Pendent aguest mes d’agost, era enterpresa tecnologica aranesa, GeoSIG Solutions, s’a installat en Centre d’Enterpreses Innovadores dera Val d’Aran.

GeoSIG Solutions, ei ua enterpresa especializada en camp des Sistèmes d’Informacion Geografica (SIG). Aguest estrument, principauments, permet generar e organizar era informacion en capes geolocalizades, entà melhorar ena gestion e er analisi des donades geografiques.

Era enterpresa aranesa, realize projèctes de cartografies e genère bases de donades geografiques des principaus hilats de servicis, e a coma objectiu implantar er emplec des SIG en ajuntaments dera Val d’Aran e deth Pirenèu entà melhorar atau era sua gestion.

Era conselhèra de Torime e Desvolopament Economic d’Aran, Anna Díaz, volec dar era benvenguda e desirar fòrça sòrt ad aguesta naua enterpresa en CEI Val d’Aran, e destaquèc que “damb era arribada GeoSIG Solutions ath delà dera entrada enes darrèri ans de diuèrses enterpreses tecnologiques e innovadores ath CEI Val d’Aran, se complís er objectiu que des deth prumèr moment se merquèc des deth Conselh Generau d’Aran sus aguest espaci, dar supòrt a emprendedors e iniciatiues deth territòri en sòn desvolopament empresariau”

Aguest centre compde damb 9 locaus entà enterpreses (7 d’eri ja aucupadi), damb ues installacions de mès de 950m2 a disposicion des emprendedors.

Cau arrebrembar qu’eth CEI Val d’Aran, da era oportunitat deth desvolopament de naues enterpreses, en tot acuélher enes sues installacions enterpreses innovadores o qu’agen relacion damb es naues tecnologies. D’autra banda, aufrís eth supòrt ath sector empresariau deth territòri mejançant era transferéncia tecnologica e melhora des hilats de cooperacion entre enterpreses deth territòri.